„ქართული ოცნება“- საქართველოს გამარჯვების პრელუდია

       11 დეკემბერს ფილარმონიის დიდ საკონცერტო დარბაზში გამართულ გრანდიოზულ ღონისძიებაზე, თითქმის ორთვიანი მოლოდინის შემდეგ ბიძინა ივანიშვილის ხელმძღვანელობით ახალი საზოგადოებრივი მოძრაობა „ქართული ოცნება“ ოფიციალურად დაფუძნდა. როგორც მოსალოდნელი იყო ღონისძიებას რამდენიმე ათას მხარდამჭერთან ერთად (რომელთა დიდი ნაწილი დარბაზში ადგილების არარსებობის გამო გარეთ დამონტაჟებული ეკრანიდან ადევნებდა თვალს) ქართული კულტურის, ხელოვნების და სპორტის ვარსკვლავები, ასევე ყოფილი სახელმწიფო მოხელეები და ოპოზიციონერი პოლიტიკოსები ესწრებოდნენ.

    ყველა ერთობის შექმნა მისასალმებელია, რომელიც საზოგადოების გამოფხიზლებას შეუწყობს ხელს, მაგრამ ასეთი დიდი, საერთო ეროვნული მოძრაობის ჩამოყალიბება ორმაგად
უფრო მნიშვნელოვანია. ვინაიდან როგორც პრეზენტაციაზე ითქვა „ქართული ოცნების“ მიზანს ქვეყნის ერთიანობის აღდგენა და საქართველოს დასავლეთთან ინტეგრაციის დაჩქარება წარმოადგენს. „ქართული ოცნება“ უნდა გახდეება ის მამოძრავებელი ძალა, რომელიც შეძლებს საზოგადოების გამოფხიზლებას და არჩევნების გზით ხელისუფლების ცვლილებას, ცვლილებას უკეთესი მომავლისათვის. როგორც თავის გამოსვლაში ბიძინა ივანიშვილმა აღნიშნა: „დღეიდან ჩვენი მიზანია ისეთი ქვეყნის აშენება, სადაც თითოეული მოქალაქის და მთელი ქვეყნის საწინდარი იქნება პატიოსნება, ღირსება და პროფესიონალიზმი, ჩვენი აფხაზი და ოსი მოქალაქეების ნდობის მოპოვება და ქვეყნის გამთლიანება, ჩვენი მოქალაქეების დასაქმება და ღირსეული შემოსავლის უზრუნველყოფა, სამართლიანობის დამკვიდრება და ჩვენს თანამემამულეებში იმედისა და რწმენის გაძლიერება, დასავლური ღირებულებების დამკვიდრება, ევროატლანტიკურ სივრცეში ინტეგრაცია და არა ევროპისაკენ სვლის იმიტაცია.“

   პრეზენტაციაზე ასევე სიტყვით გამოვიდა საქართველოს ფეხბურთის ეროვნული ნაკრების აწ უკვე ყოფილი კაპიტანი კახა კალაძე, რომელიც ღონისძიებაზე ფეხბურთის უკრაინელ ვარსკვლავთან ანდრეი შევჩენკოსთან ერთად იყო მისული. კალაძემ გარდა იმისა, რომ ყველასთვის მოულოდნელად ნაკრებიდან წასვლის შესახებ გააკეთა განცხადება ქვეყანაში შექმნილ არაჯანსაღ ვითარებაზეც ისაუბრა. მისი თქმით: „დღევანდელ ხელისუფლებას ჰგონია, რომ ჩვენ, ამ ქვეყნის მოქალაქეებს, მხოლოდ მოვალეობა გვაქვს იმისა, რომ მას ჯარიმები ვუხადოთ და გადასახადები. სინამდვილეში კი მოვალეობასთან ერთად ჩვენ უფლებებიც გაგვაჩნია. ამ დროს კი ქვეყანაში მძიმე სოციალური პირობებია შექმნილი: არ არსებობს სამართლიანი სასამართლო, ჩვენი ქვეყნის უამრავი მოქალაქე გადახვეწილია სხვა ქვეყანაში, დარჩენილებს კი უმუშევრობა ემუქრებათ, დაკარგულია ტერიტორიები... დროა ერთად დავდგეთ და კონსტიტუციით დაშვებული ყველა ფორმით ავისრულოთ ქართული ოცნება“.

   უცხოური მედიასაშუალებების ყურადღების მიღმა არ დარჩენილა „ქართული ოცნების“ პრეზენტაცია. ცნობილი იტალიური გამოცემა The Corriere della Sera „ქართული ოცნების“ პრეზენტაციას მეორე დღეს სტატიით გამოეხმაურა და მთავარი აქცენტი ბიძინა ივანიშვილისა და კახა კალაძის ერთად დგომის უპირატესობაზე გააკეთა. სტატიაში აღნიშნულია, რომ ახალ ორგანიზაციაში ადამიანები კალაძისა და ივანიშვილის ირგვლივ გაერთიანდნენ, რომლის მიზანს საქართველოს ამჟამინდელი ხელისუფლების შეცვლა წარმოადგენს: „დოლარები და ბურთი. საქართველოს უმდიდრესი ადამიანი და საქართველოს ყველაზე ცნობილი ფეხბურთელი. „ქართული ოცნება“, საქართველოს ოცნება, ახალი პოლიტიკური მოძრაობა, რომელიც პრეზიდენტ მიხეილ სააკაშვილის რეჟიმის შეცვლას ისახავს მიზნად, გუშინ თბილისში  დაფუძნდა. ადამიანები კახა კალაძისა და ბიძინა ივანიშვილის ირგვლივ გაერთიანდნენ“. 

      ბრიტანული სააგენტო „როიტერი“  კი აღნიშნავს, რომ: „ივანიშვილი მთავრობისთვის რეალური საფრთხეა, როგორც თავისი უზარმაზარი ფინანსური რესურსების, ასევე იმის გამოც, რომ მისი რეპუტაცია წარსულის პოლიტიკური მაქინაციებისგან სუფთაა“. 

ქვეყანაში გამეფებულ უკანონობაზე ისაუბრა „ქართული ოცნების“ პრეზენტაციაზე სიტყვით გამოსვლისას ადვოკატმა მანანა კობახიძემ: „გუშინ ადამიანის უფლებათა დაცვის დღე იყო. სიმბოლურია, მაგრამ ჩვენ არაფერი მისალოცი ამ დღეს არ გვაქვს ერთმანეთისთვის. გუშინ შედგა პოლიტპატიმრების სია და მათი რაოდენობა 87-ია, შესაძლოა - მეტიც. 2005 წლიდან მოყოლებული დღემდე მხოლოდ 3,7 % -ია გამამართლებელი განაჩენებისა. ოფიციალურად 25 000 პატიმარი გვყავს, მაგრამ არაოფიციალურად, ვიცით, რომ მათი რიცხვი მეტია. რა, კრიმინალურ ერად გადავიქეცით 2003 წლის შემდეგ? გაუგებარია... მე აქ დღეს იმიტომ მოვედი, რომ მჯერა, სამოქალაქო საზოგადოებას შეუძლია ეს ვითარება უკეთესობისკენ შეცვალოს“.

      ძალიან ამაღელვებელი გამოსვლა ჰქონდა მწერალ გურამ ოდიშარიას, რომელმაც ქართველი ერის ერთიანობაზე, ტერიტორიული მთლიანობის აღდგენაზე და საზოგადოებაში არსებული სიძულვილის დაძლევის აუცილებლობაზე ისაუბრა: „რაც არ უნდა კარგი კონცეფციები დაიწეროს და კარგი დოკუმენტები იქნას ხელმოწერილი, არც ერთი არ იმუშავებს, თუ ჩვენს შორის ურთიერთობის ნორმა ისევ სიძულვილი იქნება... უმთავრესი ღირებულებები უნდა დავიცვათ და შემდეგ სამოქმედო გეგმა, მთელი თავისი დეტალებით, დალაგდება. ჩვენ არ ვჭირდებით ერთმანეთს მტრებად და მოღალატეებად, ჩვენ ერთმანეთს ვჭირდებით მეგობრებად, თანამდგომებად. ჩვენ ერთმანეთისთვის მაშველი რგოლები უნდა გავხდეთ და სიძულვილი დავივიწოთ. ფეხბედნიერი ყოფილიყოს დღევანდელი დღე, როგორც ერთმანეთის მეგობრებად გარდაქმნის დასაწყისი, როგორც ეროვნული ენერგიის დაქსაქსვის დასრულების დასაწყისი“.

    ამ მართლაც ქვეყნისთვის უმძიმეს ვითარებაში მოძრაობა „ქართული ოცნების“ დაფუძნებით ბიძინა ივანიშვილმა იტვირთა პასუხისმგებლობა საქართველოს ოცნების, ქართველი ერის ოცნების ასრულების, რომელიც გულისხმობს: ერთობას, სამართლიანობას, ტერიტორიული მთლიანობის აღდგენას, ქვეყნის დემოკრატიზაციას, სოციალურ კეთილდრეობას და კანონის უზენაესობის უზრუნველყოფას. მაგრამ აუცილებლად გასათვალისწინებელია ის, რომ „ქართული ოცნების“ წარმატებული მოღვაწეობა დამოკიდებული იქნება, არა მარტო ბიძინა ივანიშვილის პოლიტიკურ აქტიურობაზე, არამედ ამ მასშტაბურ პროცესში საზოგადოების ჩართულობასა და მონაწილეობაზე. ვინაიდან საზოგადოება არის ის ძალა რომლის ერთიანობას, დარაზმულობას შეუძლია საქართველოს განვითარების გზაზე დაყენება და არსებული პოლიტიკური სიტუაციის შეცვლა ქვეყანაში.

ზურაბ ჯამბურია,

პუბლიცისტი